د نبيل د پوشش نوع له امله د ښځو او نجونو د نيولو پر وړاندې تند غبرګون

دید خبري آژانس: په تېر حکومت کې د ملي امنیت پخواني رییس رحمت الله نبیل په کابل کې د ښځو او نجونو د پوشش نوع  له امله د نیول کېدو په غبرګون کې ویلي، چې پر وړاندې یې چوپتیا «د افغانیت ضد» ده.

ښاغلي نبیل د یکشنبې په شپه (جدي ۱۷) په X ټولنیزه شبکه کې دا نیول «تښتول» وبلل او زیاته یې کړه چې په دې اړه چوپتیا یو ډول «د هېواد او خلکو سره خیانت» دی.

هغه وويل: «د طالبانو له خوا د نجونو او ښځو د برمته کولو په اړه د ځينو سياستوالو، قومي مشرانو او ديني عالمانو چوپتيا نه يوازې په دغه تاريخي جنايت کې لاس لري، بلکې د افغانستان له وطن او خلکو سره يو ډول خيانت هم دى».

د پخواني حکومت دغه چارواکي دغه چوپتيا غير اسلامي وبلله او ويې ويل: «هغه افغاني غرور چې موږ يې له زانګو څخه تر قبره پورې د خپلو ماشومانو په غوږونو کې چغې وهلې، چېرته لاړ؟»

باید وویل شي، چې د کابل ښار په برچي او د غزني په جاغوري ولسوالۍ کې یو شمېر ښځې او نجونې د حجاب د نه مراعتولو له امله نیول شوي دي.

د دغو نجونو او ښځو نيول په افغانستان او نړۍ کې ګڼ غبرګونونه راپارولي دي.

د بخښنې نړیوال سازمان، ریچارډ بینیټ او یوناما د ښځو او نجونو د توقیف د پای ته رسولو غوښتنه کړې چې د دوی د جامو د ډول پر بنسټ دي.