ملي امنیت سلاکار د ملګرو ملتونو په عمومي ناسته کې د ګډون لپاره نیویارک ته روان شو

د افغانستان د ملي امنیت سلاکار ډاکټر حمدالله محب نن (یکشنبه د تلې ۷ مه) د ملګرو ملتونو په ۷۴مه عمومي ناسته کې د ګډون په موخه نن د نیویارک پر لور وخوځېد. نوموړی به د افغان دولت په استازولۍ په دې ناسته کې وینا وکړي.

د افغانستان د ملي امنیت سلاکار ډاکټر حمدالله محب نن (یکشنبه د تلې ۷ مه) د ملګرو ملتونو په ۷۴مه عمومي ناسته کې د ګډون په موخه نن د نیویارک پر لور وخوځېد. نوموړی به د افغان دولت په استازولۍ په دې ناسته کې وینا وکړي.
ښاغلی محب به په دې وینا کې د افغانستان په اوسنۍ اوضاع، ولسمشریزو ټاکنو، سولې او ګڼو نورو موضوعاتو رڼا واچوي. ددې ترڅنګ په پام کې ده، چې ملي امنیت سلاکار د ملګرو ملتونو له سرمنشي انتونیو ګوتریز سره هم لیدنه وکړي. په دې کتنه کې به له افغانستان سره د ملګرو ملتونو پر همکاریو تمرکز وشي او دا، چې زموږ هیواد له دې همکاریو سره پر یوه ښه لوري روان دی او باید دوام ومومي.
ښاغلی محب به ددې ترڅنګ د سولې په اړه د افغان دولت او ولس دریځ هم روښانه کړي او له نړیوالو به وغواړي، چې په دې لړ کې د افغانانو پر مالکیت او د هغوی پر مشرۍ پروسې ملاتړ او حمایت وکړي.
نوموړی به ددې سفر په لړ کې همدارنګه یو شمېر ټولنو او مرکزونو کې ویناوې هم ولري.