د خوړو نړیوال پروګرام د افغانستان له خلکو سره د مرستې لپاره د ۱۷۲ میلیونو ډالرو غوښتنه کوي
د دید خبري آژانس د خبر له مخې د خوړو نړیوال پروګرام (WFP) په راتلونکي ژمي کې د افغانستان له خلکو سره د ۱۷۲ میلیونه ډالرو د خوراکي توکو د مرستې غوښتنه کړې ده.
د ملګرو ملتونو اړوند دغه نړیوال پروګرام نن (د اسد ۲۵مه) په یوه ټویټ کې لیکلي، چې هڅه کوي د ژمي د موسم له رارسېدو مخکې د افغانستان لرې پرتو سیمو ته د خوراکي توکو د رسولو لپاره کافي خوراکي توکي چمتو کړي.
د خوړو نړیوال پروګرام زیاته کړه چې دغه پروګرام د راتلونکي ژمي لپاره د چمتووالي لپاره په عاجله توګه ۱۷۲ میلیونه ډالرو ته اړتیا لري.
دا په داسې حال کې ده چې افغانستان د طا-لبانو له واکمنۍ وروسته له ژور اقتصادي بحران او د فقر او لوږې له خپرېدو سره مخ دی.
د خوړو نړیوال پروګرام د دوشنبې په ورځ پر افغانستان د طا-لبانو د واکمنۍ د کلیزې په مناسبت وویل چې د افغانستان خلکو یو نه زغمونکی کال تجربه کړ.
دغه سازمان په یوه ټویټ کې لیکلي چې په تېر کال کې د افغانستان د خلکو په ځانګړې توګه د ښځو او نجونو ژوند د نه زغملو وړ و.
د خوړو نړيوال پروګرام زياته کړه چې دغه سازمان د افغانستان د خلکو د ستونزو په پام کې نيولو سره له اړمنو کورنيو سره د مرستې لپاره په ټول هېواد کې خپل فعاليتونه زيات کړي دي.
دغه سازمان دا هم ویلي چې یوازې د روان کال له جنورۍ راهیسې دغې ادارې له ۲۱ میلیونو ډېرو اړمنو کسانو ته پاملرنه کړې ده.
