د بشري حقونو ډلو په افغانستان کې د بشري حقونو د سرغړونو د ثبت او څېړلو لپاره د یوه ځانګړي میکانیزم غوښتنه کړې ده
دید خبري آژانس: ملګرو ملتونو ته په یوه پرانیستي لیک کې د بشري حقونو شاوخوا ۶۳ ډلو په افغانستان کې د بشري حقونو د سرغړونو او جرمونو د څېړلو لپاره د یوه ځانګړي میکانیزم د رامنځته کېدو غوښتنه کړې ده.
د بشري حقونو ډلو د ملګرو ملتونو د بشري حقونو شورا غړو او څارونکو هېوادونو ته د یوه لیک په استولو سره خپلې ۳ مهمې غوښتنې مطرح کړې دي.
دوی په افغانستان کې د بشري حقونو د وضعیت په اړه د ملګرو ملتونو د ځانګړي راپور ورکوونکي ریچارډ بینیټ د ماموریت د غځولو غوښتنه کړې ده.
د دې شورا په راتلونکې غونډه کې چې ټاکل شوې په اوو ورځو کې جوړه شي، د یوه خپلواک څېړنیز میکانیزم د رامنځته کېدو عاجله اړتیا د دې ډلو له نورو غوښتنو څخه ده.
دغه سازمان هم په افغانستان کې د ښځو او نجونو د برخلیک په اړه د خبرو پر دوام ټینګار کړی دی.
په لیک کې راغلي: موږ په ټولیز ډول په افغانستان کې د یوه خپلواک تحقیقاتي میکانیزم د رامنځ ته کولو غوښتنه کوو چې دا ظلمونه مستند کړي، عاملین یې حساب کتاب وکړي او په نهایت کې د بشري حقونو د سرغړونو په مخنیوي کې مرسته وکړي.
دوی ویلي چې په تېرو دوو کلونو کې په افغانستان کې د بشري حقونو د مدافعینو، ژورنالیستانو، هنرمندانو او پخوانیو حکومتي چارواکو په وړاندې د انتقامي وژنو، اعدامونو، شکنجو، خپلسري نیولو او جبري بې درکه کولو کې د اندېښنې وړ زیاتوالی راغلی دی.
د يادونې وړ ده، چې د طا-لبانو له واکمنۍ راهيسې نجونې او ښځې د زده کړو، تګ راتګ او کار له حقه بې برخې شوي او پراسرار وژنې هم زياتې شوې دي.
