ملا برادر: جګړو د هېواد زیربنا ډېره زیانمنه کړې ده
دید خبری آژانس: د رئیس الوزرا اقتصادي مرستيال د کابل په هوايي ډګر کې د يو شمېر پروژو د پرانېستې په مراسمو کې وويل چې جګړو او شخړو بنسټيز بنسټونه زيانمن کړي، چې بايد ورغول شي.
دغه څرګندونې پرون د رئیس الوزرا اقتصادي مرستيال ملا عبدالغني برادر، د ترانسپورت او هوايي چلند وزارت سرپرست ملا حميدالله اخندزاده، د کابل نړيوال هوايي ډګر د مسوولينو په شتون، خصوصي سکتور او یو شمېر سوداګر او پانګوال کې د يو شمېر پروژو د کار د پيل په مراسمو کې وکړې.
د رئیس الوزرا اقتصادي مرستیال دفتر په یوه بیان کې د ملا برادر په حواله ویلي چې په تېرو څلوېښتو کلونو کې د جګړو او شخړو له امله د هېواد زیربناوې او نور سکتورونه ډېر زیانمن شوي او اقتصاد یې هم له زیان سره مخ شوی دی.
هغه زیاته کړه، ط-البانو د نورو سکتورونو تر څنګ له «فتح» وروسته د زیربناوو بیارغونې ته هم ځانګړې پاملرنه کړې او په بېلابېلو برخو کې یې فعالیتونه او هڅې د دې خبرې ښکاره بېلګه ده.
نوموړي دغه راز په هېواد کې دننه او بهر له سوداګرو او پانګوالو وغوښتل چې د هېواد په بيارغونه کې ونډه واخلي.
په دې مراسمو کې د دغه وزارت اقتصادي مرستیال هم وویل، چې امنیت د یوه هېواد د پرمختګ لپاره تر ټولو مهم شرط دی او دا مهال په افغانستان کې ملي امنیت تامین شوی او په بېلابېلو برخو کې د پانګونې لپاره ښه فرصتونه برابر شوي دي.
په خبرپاڼه کې دا هم ویل شوي چې د کابل په هوايي ډګر کې د خصوصي سکتور له خوا د میلیونونو افغانیو په ارزښت یو شمېر منځنۍ او وړې پروژې بشپړې او ګټې اخیستنې ته وسپارل شوې.
