د بشري حقونو د څار اداره: په افغانستان کې د بشري حقونو کړکېچ ویجاړونکی دی
ډید خبري اژانس: د بشري حقونو د څار اداره وايي، د ښځو او نجونو پر وړاندې د طا-لبانو کړنې «د بشریت ضد جنایت» دی او باید ژر تر ژره اقدامات وشي.
د بشري حقونو د څار په سازمان کې د افغانستان د چارو څېړونکې فرشته عباسي په جینوا کې د ملګرو ملتونو د بشري حقونو د شورا په ۵۴ مه غونډه کې وویل چې د ښځو او نجونو پر وړاندې د طا-لبانو ځینې کړنې د جنسیتي ځورونې پر بنسټ بشري جنایت دی.
هغه زیاته کړه، طا-لبانو له دوو کلونو راهیسې د ښځو او نجونو له حقونو څخه په پراخه او منظم ډول سرغړونې کړي او له عامه ژونده یې لیرې کړي دي.
هغه څرګنده کړه: د بشري حقونو د څار اداره په دې باور ده چې د دغو سرغړونو څخه ځینې یې د جنسیتي ځورونې پر بنسټ د بشریت ضد جرمونه دي.
عباسي دا هم وویل، چې طا-لبانو رسنۍ له منځه وړي او په خپلسري ډول یې خبریالان او نور منتقدین نیولي او شکنجه کړي دي.
د هغه په وينا، طا-لبانو په ناقانونه توګه يو شمېر LGBT کسان او دولتي کارکوونکي او د امنيتي ځواکونو پخواني غړي اعدام کړي دي.
هغه ویلي دي چې افغانستان په نړۍ کې یو له بدو بشري ناورین سره مخ شوی او دوه پر دریمه برخه نفوس یې بیړنیو مرستو ته اړتیا لري.
هغه د دې وضعیت د خرابیدو پړه پر طا-لبانو واچوله.
د بشري حقونو د څار سازمان د افغانستان د چارو څیړونکي ټینګار وکړ چې د بشري حقونو شورا باید «د جدي نړیوالو جرمونو لپاره د اوږدمهاله معافیت پای ته رسولو» لپاره ډیر څه وکړي.
د بشري حقونو د څار سازمان د بشري حقونو په برخه کې د ځانګړي راپور ورکوونکي دنده اړینه وګڼله او د هغه د دندې د غځولو غوښتنه یې وکړه.
عباسي ټینګار وکړ چې د بشري حقونو شورا باید د نړیوالو جرمونو د ځوابولو لپاره یو وقف، خپلواک او بې طرفه میکانیزم رامنځته کړي.
عباسي: د ښځو او نجونو د حقونو د دفاع لپاره باید ډېر کار وشي. د ۲۰۲۳ کال د جون په میاشت کې د ښځو او نجونو پر وړاندې د تبعیض په اړه د ځانګړي راپور ورکوونکي او کاري ډلې ګډ راپور یو مهم ګام و، خو شورا باید خپل وړاندیزونه په بشپړه توګه پلي کړي.
د هغه په وينا، په افغانستان کې د بشري حقونو کړکېچ يو ويجاړونکی او شدت کوونکی بحران دی او عاجل اقداماتو ته اړتيا لري.
دا غونډه پرون د افغانستان په اړه جوړه شوې وه.
