اميري: په افغانستان کې پر ښځو ظلم د اسلامي هېوادونو لپاره خطرناک چاپېريال رامنځته کوي
ډید خبري اژانس: په افغانستان کې د ښځو او بشري حقونو لپاره د امریکا ځانګړې استازې رینا امیري د سعودي عربستان په ګډون د یو شمېر اسلامي هېوادونو له استازو سره خپلې لیدنې اعلان کړې.
رینا امیري په څو ټویټونو کې ویلي چې په دې غونډو کې هوکړه وشوه چې د افغان ښځو او نجونو «سخت» ځورونه د اسلامي هېوادونو لپاره «خطرناک مثال» جوړوي.
نوموړي لیکلي، چې په دې وروستیو کې یې متحده عربي اماراتو ته سفر کړی او د البانیا، بنګله دېش، مراکش، سعودي عربستان، تونس او د اسلامي همکاریو سازمان له استازو سره یې لیدنې کتنې کړې دي.
اميري دغه خبرې «د هيلې دک» وبللې او ويې ويل چې د هېوادونو استازو ويلي چې د ښځو حقونه په اسلام کې خوندي دي.
هغه زیاته کړه: یو پراخ توافق شتون درلود چې د افغان میرمنو او نجونو سخت ځورونه په ځانګړې توګه د مسلمان اکثریت هیوادونو لپاره یو خطرناک مثال دی.
امیري ټینګار وکړ چې د طا-لبانو د ځپلو سیاستونه باید نورمال نه شي او نړۍ باید د افغانستان د ښځو او نجونو تر څنګ ودرېږي.
اوس مهال طا-لبانو ښځې او نجونې له زده کړو، کار او ازاد تګ راتګ څخه بې برخې کړي دي.
اميري په دې وروستيو کې وويل چې د هېوادونو له استازو سره يې هوکړه کړې چې د ډيپلوماټيکو هڅو او ثابت ملاتړ له لارې د افغانستان د خلکو د ملاتړ لپاره خپلو همکاريو ته دوام ورکړي.
