د دید خبري آژانس د خبر له مخې د بهرنیو چارو وزارت نژدی ته چاودنې ۲ تنه وژلي او ۱۰ نور یې ټپیان کړي دي.
د ايمرجنسي روغتون چارواکي وايي، د دوشنبې په ورځ (۷حمل) د بهرنيو چارو وزارت ته څېرمه له چاودنې څخه دغه روغتون ته دوه جسدونه او لس ټپيان لېږدول شوي دي.
دا چاودنه څو شېبې وړاندې د داوودزي د سوداګریز مرکز د دروازې مخې ته شوې ده. دا مرکز د بهرنیو چارو وزارت ودانۍ ته څېرمه موقعیت لري.
د ایمرجنسي روغتون په یوه ټویټ کې لیکلي، چې د دغه روغتون د جراحۍ څانګې ته د یوه ماشوم په ګډون ۱۲ کسان لېږدول شوي او دوه کسان د درملنې پر مهال مړه شوي دي.
سرچينې زياته کړې وه، چې په دې چاودنه کې مرګ ژوبله اوښتې، خو کره شمېره يې نه ده معلومه.
تر اوسه د چاودنې د نوعیت په اړه څه نه دي ویل شوي.
د تېر کال په ژمي کې د بهرنیو چارو وزارت مخې ته چاودنې لسګونه کسان مړه او ټپیان کړل.
داعش د دغې چاودنې مسوولیت منلی دی.
