په پاکستان کې د وسله والو له خوا ۸ تنه مسافر ووژل شول

دید خبری اژانس: وسله والو کسانو د پاکستان په شمال کښې په یوه مسافر وړونکی بس حمله وکړه او اته تنه یې په ډزو ووژل.

سیمه ییزو چارواکو ویلي، چې وسله والو کسانو پرون ماسپښین د پاکستان په شمال کې د چیلاس ښار ته څېرمه پر یوه مسافر وړونکي بس برید کړی، چې اته تنه مسافر یې وژلي او شاوخوا ۲۶ نور یې ټپیان کړي دي.

د ګلګت بلتستان د پولیسو ویاند غلام عباس ویلي چې په وژل شویو کې دوه پوځیان هم شامل دي.

د عباس په خبره، په دې برید کې ۲۶ نور مسافر ټپیان شوي دي.

دغه بس د قراقروم پر لویه لار چې د نړۍ یو له لوړو سړکونو څخه دی، روان و.

چارواکو وویل، برید د ماښام شاوخوا ۶:۳۰ بجې (د GMT ۱:۳۰) هغه مهال وشو کله چې بریدګرو په بس باندې ډزې وکړې، چې بیا له یوې لارۍ سره ټکر شو.

په سمدستي توګه د حملې ذمه واري کومې ډلې په غاړه نه ده اخستې او نه هم د ډزو انګېزه معلومه ده.

چیلاس د خېبر پښتونخوا شمال لوېدیځ ته د بلتستان د ګلګت په غرنۍ سیمه کې موقعیت لري، چیرې چې په وروستیو کلونو کې بریدونه زیات شوي، چې ځینې یې د پاکستاني طا-لبانو، یا تحریک طا-لبان پاکستان (TTP) لخوا ادعا شوي.

دا برید په داسې حال کې شوی، چې په ټول هېواد او په ځانګړې توګه په خیبر پښتونخوا او بلوچستان کې د وسله والو بریدونه ډېر شوي دي.

دواړه ایالتونه له افغانستان سره ګډه پوله لري.