ډید خبري اژانس: د پاکستان د موقت حکومت لومړي وزیر ویلي چې په افغانستان کې یوه ډله واک او اختیار لري او نه شي کولای په خپله خاوره کې له ځینو ترهګرو ډلو سره جګړه وکړي.
د پاکستان لومړي وزیر انوارالحق کاکړ له ټي آر ټي خبري چینل سره په مرکه کې د افغانستان او له ترهګرۍ سره د مبارزې په اړه ویلي، چې امریکا او متحدین یې د دوه ټریلیون ډالرو په لګولو سره سره نه شي کولای چې مرکزي واک ولري او یو موقت حکومت لا هم کار کوي.
انوارالحق کاکړ وویل: په افغانستان کې اوس مهال د یوې ډلې واک او اختیار شتون لري، دوی په خپله خاوره کې ځینو ډلو ته ځواب نه شي ویلی، نو وخت ته اړتیا لري. او د تحریک طا-لبان پاکستان په څېر ډلې چې په افغانستان کې ژوند کوي، موږ له هغوی سره په دې ډول مسایلو خبرې کړې دي.
هغه په افغانستان کې د امریکا او ناټو د شل کلن حضور موخه د مرکزي واک په درلودلو سره د سازمانونو رامنځته کول او د ملت جوړونې پروژه ګڼله، چې ناکامه شوه.
د پاکستان لومړي وزیر د افغانستان او پاکستان امنیتي وضعیت ته په اشارې سره وویل، کله چې لویدیځ خپل هدف ته ونه رسیده، په څو ساعتونو کې د ملیشو یوې ډلې حکومت جوړ کړ او د افغانستان واک یې په لاس کې واخیست.
د هغه په وينا، افغان طا-لبانو منلې ده چې د امنيت د تامينولو او په افغانستان کې دننه د ترهګرو ډلو پر وړاندې د مبارزې لپاره ډېر وخت ته اړتيا لري.
هغه زیاته کړه چې له ننګونو سره سره پاکستان د ترهګرو ډلو د له منځه وړلو لپاره له افغان طا-لبانو سره خبرې کوي، ځکه دا د دواړو هېوادونو په ګټه ده.
د دې پوښتنې په ځواب کې چې ایا اسلام اباد په کابل کې د طا-لبانو په واک کې راوستلو او سیاسي بهیر ته پښیمانه دی، کاکړ وویل، طا-لبان د امریکا او متحدینو له خوا په سیاسي بهیر کې راوستل شوي او پاکستان د دې لوی تصویر یوازې یوه برخه ده.
