سیګار په سویس کې د افغانستان له وجهي صندوق څخه د ناوړه ګټې اخیستنې په اړه اندیښنه لري
ډيډي خبري اژانس: سیګار په یوه راپور کې ادعا کړې چې طا-لبان په سویس کې د افغانستان د وجهي صندوق له پیسو ناوړه ګټه اخلي.
د افغانستان په چارو کې د امریکا د ځانګړي سرمفتش دفتر (سیګار) د امریکا کانګرس ته په خپل نوي راپور کې په سویس کې د افغانستان له پیسو څخه د ناوړه ګټې اخیستنې په اړه اندیښنه څرګنده کړې ده.
سيګار وويل: اماني صندوق له هغو فعاليتونو سره مالي مرسته نه ده کړې چې د افغانستان خلکو ته ګټه رسوي.
دې ادارې زیاته کړې، چې طا-لبانو د مشکوکو مالي فعالیتونو د څارنې د څانګې د مسوول په ټاکلو کې رول لوبولی دی.
د سیګار نوی راپور د امریکا د استازو جرګې د بهرنیو اړیکو د کمیټې د رییس په غوښتنه چمتو شوی او د دې کمیټې رییس مایکل مک کال ته ورکړل شوی دی.
د دغه راپور پر بنسټ، د افغانستان له وجهي صندوق څخه د پیسو ایستل د دغه صندوق د ټولو غړو له مثبتو رایو وروسته ترسره کېږي او ویل کېږي چې د دې صندوق هر غړی د ویټو حق لري.
د يادونې وړ ده، چې د راپورونو له مخې، دغه صندوق تر اوسه له ١٥٥ ميليونو ډالرو ډېر عايد ترلاسه کړى دى.
