ډید خبري اژانس: د سپینې ماڼۍ ویاند ویلي دي چې طا-لبانو د دوحې په تړون کې خپل مسوولیتونه نه دي پوره کړي.
د سپینې ماڼۍ ویاندې کارین جین پییر پرون په یوه خبري غونډه کې وویل چې په ۲۰۲۰ کال کې له طا-لبانو سره د دوحې د هوکړې لاسلیک دغه ډله پیاوړې کړې او د افغانستان په تېر حکومت کې زموږ همکاران یې کمزوري کړي دي.
پییر ویلي دي: لکه څنګه چې تاسو خبر یاست، پخوانۍ ادارې څلور کاله وړاندې له طا-لبانو سره په ۲۰۲۰ کال کې د دوحې تړون لاسلیک کړ او ژمنه یې وکړه چې د ولسمشر بایډن له کاره څو میاشتې وروسته له کومې څرګندې لارې او پلان پرته خپل ځواکونه وباسي.
د دوحې تړون د ۲۰۲۰ کال د فبرورۍ په ۲۹ مه د ډونالډ ټرمپ د ولسمشرۍ پر مهال په قطر کې د امریکا او طا-لبانو ترمنځ لاسلیک شو.
جین پییر زیاته کړه: دې تړون طا-لبان پیاوړي کړل او په افغان حکومت کې یې زموږ شریکان کمزوري کړل.
که څه هم ټرمپ په وار وار د دغه تړون له لاسلیک څخه دفاع کړې او ویلي یې دي چې نه ختمیدونکې جګړې د امریکایانو ژوند اخیستی او باید پای ته ورسېږي، خو د امریکا پخواني ولسمشر او یو شمېر جمهوري غوښتونکو تل پر جوبایډن نیوکه کړې چې څنګه یې افغانستان پرېښود.
خو سپینې ماڼۍ ویلي دي: له افغانستان څخه د وتلو د څرنګوالي په اړه د ولسمشر بایډن انتخاب د هغه د مخکیني ولسمشر ډونلډ ټرمپ له خوا د رامنځته شویو شرایطو تر اغیزې لاندې و. کله چې بایډن واک ته ورسید، طا-لبان له ۲۰۰۱ راهیسې په خپل قوي دریځ کې وو او د هیواد نږدې نیمایي یې کنټرول یا ننګولې.
امریکايي چارواکي وايي چې طا-لبانو په دغه تړون کې ژمنه کړې وه چې د یوه ټول شموله حکومت د جوړولو لپاره به له نورو افغان خواوو سره خبرې کوي.
خو ژان پییر وویل: طا-لبانو په (تړون) کې خپل مسوولیتونه نه دي پوره کړي. طا-لبانو لا هم خپلې ژمنې نه دي پوره کړي چې له افغانانو سره به د یوه هر اړخیز او ټول شموله سیاسي نظام د رامنځته کولو لپاره له افغانانو سره د خبرو اترو پیل وکړي.
د سپینې ماڼۍ ویاند په دوام وویل چې امریکا له طا-لبانو سره د خپلو ژمنو حساب ورکوی او زیاته یې کړه: موږ هره ورځ نه ستړې کیدونکې هلې ځلې کوو چې د دغو ژمنو د عملي کیدو ډاډ ترلاسه کړو.
امریکايي چارواکي وايي، د دوحې د هوکړې له مخې باید طا-لبان اجازه ور نه کړي چې ترهګرې ډلې په افغانستان کې بیا فعالیت وکړي، افغانستان د نورو هېوادونو پر ضد وکاروي او له ترهګرو ډلو سره دې اړیکې پرې کړي.
دا په داسې حال کې ده چې طا-لبانو تل ادعا کړې چې په افغانستان کې القاعده شتون نه لري، داعش ځپل شوی او هیچا ته اجازه نه ورکوي چې له افغانستانه پر بل هېواد برید وکړي.
