د ژغورنې ملي مقاومت شورا:
د طالبانو نه په رسمیت پیژندل زموږ د هڅو پایله ده/ تاسو به په نږدې راتلونکي کې بدلونونه وګورئ
دید خبری اژانس: د افغانستان د ژغورنې د ملی مقاومت شورا په یوه خبری غونډه کښې د افغانستان شمال او شمال ختیځ ته د تحریک طا-لبان پاکستان د انتقال، بین الافغانی مذاکراتو او د طا-لبانو د مخالفو ځواکونو د یو چتر لاندې د ادغام د هڅو په هکله خپل دریځ څرګند کړ.
د ژغورنې ملي شورا د دوشنبې په ورځ (د سرطان ۵ مه) د کابل پر وخت په یوه خبري غونډه کې شمال ته د تحریک طا-لبان پاکستان د انتقال په ګډون د بېلابېلو مسایلو په اړه دریځ څرګند کړ.
د دې شورا يو تن غړي مولوي قرلق د يوې پوښتنې په ځواب کې وويل چې د دې شورا هڅې تر دې دمه طا-لبان د هغو هېوادونو له خوا هم په رسميت نه دي پيژندل شوي چې له کومو هېوادونو سره اړيکې لري.
مولوي قرلق وويل چې دغه شورا له انلاين ناستو راضي نه ده او بېلابېلې کمېټې يې له هېوادونو، نړيوالو سازمانونو او بېلابېلو جريانونو سره په اړيکه کې دي، څو د اوسنيو حالاتو د کابو کولو لپاره پرمختګونه وکړي.
د هغه په وينا، په نږدې راتلونکي کې به د افغانستان په وضعيت کې بدلونونه وليدل شي.
په همدې حال کې د دغې شورا بل غړی خالد پښتون وايي چې دا حرکتونه طبیعي مهاجرت نه، بلکې شمال ته د ترهګرۍ د لېږد او د منځنۍ اسیا د هېوادونو د بې ثباته کولو هڅه ده.
هغه زیاته کړه، د افغانستان د ژغورنې لپاره د ملي مقاومت شورا دغه اقدام ردوي او منځنۍ اسیا او شمالي ګاونډیو ته د ترهګرۍ د صادرولو په مانا دي.
د دې شورا بل غړي ډاکټر مهدیيار وويل، دوى هڅه کوي چې د دې شورا تر چتر لاندې يو شمېر مهم او مخور شخصيتونه او ګوندونه همغږي کړي او له اوسني بحران څخه د وتلو هڅه وکړي.
ښاغلي مهدییار زیاته کړه چې دوی هڅه کوي د اوسني وضعیت لپاره بدیل وي او هڅه کوي چې طا-لبان د دوحې د هوکړې له مخې خبرو ته حاضر کړي.
د دې شورا بل غړى ډاکټر حسين ياسا وايي، چې د اوس لپاره پوځي انتخاب له پوښتنې څخه بهر دى او دغه شورا ورته چمتو نه ده، ځکه نه غواړي چې جګړه دوام وکړي او هېواد ويجاړ شي.
ښاغلي یاسا دا هم وویل چې اوس مهال په افغانستان کې هیڅ ښکېل لوري د پوځي انتخاب ملاتړ نه کوي او ټول په بین الافغاني مذاکراتو او د ټول شموله حکومت پر جوړولو ټینګار کوي.
خو په ازبکی ژبه کې د يوې پوښتنې په ځواب کې مولوي قرلق وويل، چې که طا-لبان خبرو ته چمتو نه وي، پوځي انتخاب له پوښتنې څخه بهر نه دى.
