د دوحې د غونډې په څنډه کې د ښځو د حقونو فعالانو په افغانستان کې د جنسیتي تبعیض د پیژندلو غوښتنه وکړه
دید خبري آژانس: د دوحې د غونډې په څنډه کې د بشري حقونو لسګونو بنسټونو او شاوخوا ۱۷۰ ښځینه فعالانو په یوه لیک کې د دوحې د غونډې له ګډونوالو غوښتي، چې په افغانستان کې د جنسیتي تبعیض په رسمیت وپېژني.
د دې لیک په یوه نسخه کې، دوی د دوحې د غونډې له ګډونوالو وغوښتل چې د طا-لبانو د واکمنۍ پر مهال جنسیتي توپیر په رسمیت وپيژني.
د دې لیک لاسلیک کوونکو د هېوادونو له استازو غوښتي چې د دوحې په غونډه کې د ښځو حقونه د بحث مرکز وي او د افغانستان په اړه هره پرېکړه باید د ټولو ښځو د حقونو د بیا تامین او په هېواد کې د عدالت او ازادۍ د تامین ضمانت وکړي.
د ښځو فعالانو هم د هېوادونو له ځانګړيو استازو غوښتي چې د دوحې ناسته په ژوندۍ بڼه له رسنیو خپره کړي او که دا کار ممکن نه وي، د هرې ورځې په پای کې د خپلو غونډو راپور ورکړي.
ښځینه فعالانو هم د افغانستان لپاره د ملګرو ملتونو د ځانګړي همغږي کوونکي د خپلواکې ارزونې په اړه خپلې اندېښنې څرګندې کړې دي.
د دوی په وینا، دا ارزونه هراړخیزه او دقیقه نه ده او د افغانستان اصلي وضعیت په ځانګړې توګه اوسنی «جنسي نژادي تبعیض» نه منعکسوي.
د ښځو فعالانو ټینګار کړی، چې د ملګرو ملتونو د همغږي کوونکي د ارزونې پر بنسټ هره پرېکړه به رښتینې او هر اړخیزه نه وي.
د لیک لاسلیک کوونکو په افغانستان کې د جنسیتي توپیر او د ښځو پر وړاندې د محدودیتونو د پای ته رسولو لپاره پر طا-لبانو د لا زیاتو فشارونو غوښتنه کړې ده.
ټاکل شوې د افغانستان په چارو کې د هېوادونو د ځانګړي استازي دوهمه غونډه سبا او بله ورځ په دوحه کې د ملګرو ملتونو د سرمنشي په کوربه توب جوړه شي.
