د دید خبری اژانس: پاکستان د پرله پسې پیښو او ریل ګاډو له پټلۍ څخه د وتلو چې په کې د ملتان ته نږدې وروستۍ مرګونې پیښه هم شامله ده، د دسمبر تر ۳۱ پورې په خپلو ریل ګاډو کې بیړنی حالت اعلان کړی دی.
د راپورونو له مخې دا پریکړه د شنبې، اکتوبر له ۲۴مې نیټې څخه نافذه شوه، او د ریل ګاډو د کارمندانو او چارواکو ټولې رسمي رخصتۍ، پرته له طبي رخصتۍ، لغوه شوې دي.
د پاکستان د ریل ګاډو وزیر حنیف عباسي ویلي دي چې د کال تر پایه پورې، د دې ادارې چارواکي باید د مسافرو او بار وړونکو واګونونو، لوکوموټیو، سیګنال سیسټمونو او نورو زیربناوو کې د عملیاتي نیمګړتیاو د له منځه وړلو لپاره کار وکړي.
هغه خبرداری ورکړ چې د هغه په ګډون هیڅ عملیاتي چارواکي ته به اجازه ورنکړل شي چې د شنبې او یکشنبې رخصتۍ وکاروي او له سرغړونکو سره به چلند وشي.
د پاکستان د ریل ګاډو وزارت چارواکو او کارمندانو ته هم لارښوونه کړې چې په ټول هیواد کې د مسافرو او بار وړونکو سفرونو خوندیتوب ډاډمن کولو لپاره په ساحه کې د ریل ګاډو عملیات وڅاري.