د دید خبري اژانس: د عاشورا د ورځې په یاد، د افغانستان پخواني ولسمشر د امام حسین (ع) حرکت د ټولنیزو انحرافاتو په وړاندې د اصلاحاتو، مسؤلیت او مقاومت سمبول وباله.
حامد کرزی: عاشورا د انحراف او ظلم پر وړاندې د مقاومت پیغام لري
د افغانستان پخواني ولسمشر حامد کرزي د عاشورا د ورځې په مناسبت یو پیغام خپور کړ، چې د کربلا د شهیدانو د یاد درناوی او د امام حسین (ع) د غورځنګ د پیغامونو پر اهمیت یې ټینګار وکړ.
هغه وویل چې د عاشورا پاڅون له اخلاقي او ټولنیزو لارښوونو ډک دی او اصلي پیغام یې د ټولنې اصلاح، مسؤلیت او د انحرافاتو او بې عدالتیو په وړاندې مقاومت دی.
کرزي دا هم زیاته کړه چې افغان خلک، لکه د نړۍ د نورو مسلمانانو په څیر، د عاشورا درناوی کوي او د اهل بیتو مینه د اسلامي یووالي او پیوستون لپاره یو مهم عامل ګڼي.
په پای کې، هغه د هیواد له اتباعو وغوښتل چې د دې ورځې له معنوي پیغام څخه ګټه پورته کړي او د افغانستان د ملي یووالي، پرمختګ او سوکالۍ د پیاوړتیا لپاره کار وکړي.