د دید خبري آژانس د خبر له مخې، په بدخشان کې د رالوېدلې الوتکه چې مخکې ویل کېدل د هند د هوايي شرکت اړوند بلل کېږي، د دغه هېواد له لوري رد شوې ده. دا الوتکه د روسیې د هوايي شرکت اړوند وه.
له بدخشان ولايت نه په رارسيدلي خبرکې ويل شوي چې نن شنبه (د دلو لومړۍ نېټه) د دغه ولايت په زيباک ولسوالۍ کې يوه الوتکه لوېدلې ده.
د بدخشان د اطلاعاتو او فرهنګ رييس ذبيح الله اميري په بدخشان کې د دغې مسافر وړونکې الوتکې د غورځيدو خبر ورکړ او ويې ويل چې د دغې پيښې د لا زياتې څيړنې او څيړنې لپاره سيمې ته يو ټيم استول شوى دى.
مخکې ویل شوي وو چې الوتکه د هند د هوايي چلند شرکت وه، خو د هند د ملکي هوايي چلند ادارې دا خبرونه رد کړل.
په همدې حال کې د روسیې د هوايي چلند ادارې په بدخشان کې د ورکې شوې الوتکې په اړه نور معلومات خپاره کړي دي.
د Falcon 10 کوچنۍ الوتکه کې څلور عمله او دوه روسي مسافر وو.
دغه الوتکه د هند له ګیا، د ازبکستان تاشکند او د روسیې ژوکوفسکي ته پر لاره وه.
د دغې ادارې له خوا په خپره شوې خبرپاڼه کې راغلي چې له دغې الوتکې سره د شنبې په ورځ د جدي په ۳۰مه هغه مهال اړیکه پرې شوه چې د افغانستان په هوايي حریم او د تاجکستان پولې ته څېرمه د الوتنې په حال کې وه او د رادار له پردې ورکه شوه.
روزاویتسیا ویلي چې له طا-لبانو او تاجکستاني هوايي چلند چارواکو سره په تماس کې دی او د الوتکې لټون روان دی.
دا الوتکه د روسیې د ملکي الوتکو په لست کې ثبت شوه. په روسیه کې د دې الوتکې د راجستریشن نمبر RA-09011 دی چې سیریل نمبر ۱۲۸ دی.
د روسیې د هوايي ترانسپورت فدرالي ادارې لیکلي چې دغه Falcon 10 په ۱۹۷۸ کال کې د فرانسوي شرکت Dassault Aviation لخوا تولید شوی و.
دا الوتکه د اتلانتیک ګروپ لمیټډ پورې اړه لري او یوه کس د دې کوچنۍ الوتکې شخصي ملکیت اخیستی دی.
تر اوسه د دغې الوتکې د غورځېدو د مرګ ژوبلې په اړه څه نه دي ویل شوي.
