د دید خبري اژانس: د پاکستان او افغانستان ترمنځ د کړکیچونو د زیاتوالي او د دواړو هیوادونو ترمنځ د سوداګرۍ د ځنډیدو وروسته، د پاکستان په بازارونو کې د انارو بیه د پام وړ لوړه شوې ده، او د کویټې په ښار کې د هر کیلوګرام بیه ۹۰۰ روپیو ته رسیدلې ده.

راپورونه ښیي چې له افغانستان څخه د کرنیزو وارداتو د ځنډیدو له امله د پاکستان د میوو په بازار کې د انارو کمښت راغلی دی، چې د دې میوې په بیه کې د پام وړ زیاتوالی راغلی دی.
د خپرو شویو معلوماتو پر بنسټ، د پاکستان په کوبټې ښار کې د یو کیلوګرام انارو بیه ۹۰۰ روپیو ته رسیدلې ده، چې له دوه چنده څخه ډیر زیاتوالی ښیي.
پاکستان پخوا د افغان انارو د خرڅلاو لپاره یو له مهمو بازارونو څخه و، او یوازې په ۲۰۲۴ کال کې یې له افغانستان څخه د ۱۸ ملیون ډالرو څخه ډیر ارزښت لرونکي انار وارد کړل.
دا وضعیت یو ځل بیا د افغان کرنیزو محصولاتو باندې د پاکستاني بازارونو انحصار او د دواړو هیوادونو ترمنځ د سوداګریزو کړکیچونو اقتصادي پایلې روښانه کوي.