د الخلیل محاصره لسمې ورځې ته ننوته؛ زرګونه فلسطینیان بې ځایه شوي
د دید خبري اژانس: اسراییلي ځواکونو د لویدیځې غاړې الخلیل ښار د لسمې پرله پسې ورځې لپاره محاصره کړی دی. روانو پوځي عملیاتو، د تګ راتګ محدودیتونو او جبري ایستلو د ښار د اوسیدونکو ژوند ګډوډ کړی دی.
د “القاهرة الاخباریه” ویب پاڼې په وینا، د القدس پوهنتون شاوخوا یو شمیر کورنۍ هم د خپلو کورونو پریښودو ته اړ شوي دي. د الخلیل ښاروال یوسف الجعبري وویل چې د اسراییلو پوځي اقداماتو سړکونه، د اوبو رسولو او د فاضله موادو شبکې زیانمنې کړې دي.
د فلسطینیانو د ډله ایزې سزا د دوام په اړه خبرداری ورکولو سره، الجعبري وویل چې ښاروالۍ د سرچینو د نشتوالي سره سره د اتباعو د ملاتړ لپاره کار کوي.
د میاشتې په لومړۍ ورځ د “فرش الهو” پوستې کې د ډزو وروسته محاصره شدت وموند چې دوه اسراییلي سرتیري یې ووژل. له دې وروسته، اسراییلي ځواکونو د لویدیځې غاړې په ځینو برخو کې عملیات او چاپې پراخې کړې، کورونه او سوداګریز مرکزونه یې ویجاړ کړل.
د خپاره شوي راپور له مخې، د دې اقداماتو په پایله کې لږ تر لږه ۲۰۰۰ فلسطینیان بې ځایه شوي دي.