د پاکستان په کوهاټ کې د پولیسو لاینز خونړی برید؛ ۲۱ کسان ووژل شول، ۱۰۳ ټپیان شول

د دید خبري اژانس: د پاکستان په کوهاټ کې د پولیسو لاینز کې په یوه جومات کې د چاودنې او ترهګریز برید له امله لږ تر لږه ۲۱ کسان ووژل شول، چې ۱۵ پولیس او ۶ ملکي وګړي پکې شامل وو او ۱۰۳ نور ټپیان شول.

د کوهاټ د ولسوالۍ د مرکزي روغتون د لومړني راپور له مخې، چاودنه د جمعې په ورځ شاوخوا ۱:۲۰ بجې د هنګو سړک په پولیس لاینز کې په یوه جومات کې د جمعې د لمانځه پر مهال وشوه. له چاودنې وروسته وسله وال بریدګر هم د پولیسو لاینز سیمې ته ننوتل.

د پولیسو چارواکو وویل چې په برید کې شاوخوا اووه وسله وال بریدګر شامل وو او د ځانمرګي بریدګر په ګډون شپږ بریدګر ووژل شول.

د ملکي قربانیانو په منځ کې، د ډاکټر اسراییل خان اورکزي نوم هم شامل دی، چې د ماشومانو ډاکټر او د کوهاټ د لیاقت میموریل روغتون کې د ولسوالۍ د تخصصي څانګې مشر و.

د روغتیا راپور زیاته کړه چې د ټولو ۱۰۳ ټپیانو څخه، ۷۳ پولیس وو او ۳۰ ملکي وګړي وو. ۹۰ ټپیان د کوهاټ ولسوالۍ مرکزي روغتون ته او ۱۳ نور د لیاقت میموریل روغتون ته لیږدول شوي دي.

د حافظ ګل بهادر په مشرۍ د اتحاد المجاهدین پاکستان (IMP) په نوم یوې ډلې د برید مسؤلیت په غاړه واخیست.

پاکستان په وار وار د افغانستان د طالبانو له حکومت څخه غوښتي چې د پاکستان دننه د بریدونو ترسره کولو لپاره د افغانستان له خاورې څخه د کار اخیستلو مخه ونیسي. د طالبانو حکومتي چارواکو تر اوسه په رسمي ډول د برید او د دې ډلې د مسؤلیت ادعا په اړه غبرګون نه دی ښودلی.