د دید خبري اژانس: د کندهار ښاروالۍ اعلان کړی چې د کندهار ښار د احمد شاهي سړک د پراختیا پروژې شاوخوا ۵۰ سلنه کار بشپړ شوی او ټاکل شوې ده چې په راتلونکو دریو اونیو کې د دې سړک د پخولو کار پیل شي.
د کندهار ښاروالۍ؛ د احمد شاهي سړک د پخولو کار به په نږدې راتلونکي کې پیل شي
دې ادارې نن (پنجشنبه، د اسد ۸مه) په یوه مطبوعاتي اعلامیه کې وویل چې په دې وروستیو کې یې د دې سړک د بنسټیزې طبقې کار پیل کړی او تر اوسه پورې د بنسټیزې لارې دوه کیلومتره پخه شوې ده. پاتې برخې به د دې مرحلې له بشپړیدو وروسته د پخولو لپاره چمتو شي.
دا سړک د سردار مدد خان څلور لارې څخه پیل کیږي او د ډنډ څلور لارې ته به د ۳.۵ کیلومتره اوږدوالي او ۶۰ متره پلنوالي سره جوړ شي. د پلچکونو او پیاده روونو جوړول هم په دې پروژه کې شامل دي، او د پلي کولو لپاره یې نږدې یو ملیارد افغانۍ ځانګړې شوې دي.