د دید خبري اژانس: په کندهار کې ځايي سرچینو ویلي چې د طالبانو د امر بالمعروف وزارت په تیرو دوو ورځو کې د ښځو د لوازمو بازارونو پراخه پلټنه پیل کړې او یو شمیر دوکانداران یې نیولي دي. د سرچینو په وینا، د طالبانو مامورین د عملیاتو په جریان کې ښځو ته خبرداری ورکړ چې “باید له کوره ونه وځي”.
د سرچینو په وینا، د طالبانو د عامه نظم مامورین د عملیاتو په جریان کې له ښځو سره “په سپکه ژبه” خبرې وکړې او هغوی ته یې خبرداری ورکړ چې “باید له محرم پرته له کوره ونه وځي.” د دویمې ناحیې په یوه ښځینه لوازمو پلورونکي وویل: “له پرون راهیسې، د عامه نظم خلک په دوامداره توګه ګزمې کوي، دوکانونو ته ورځي او حتی هغه زړې میرمنې سپکوي چې حجاب اغوندي.”
سرچینو دا هم تایید کړه چې طالبانو څو دوکانداران نیولي دي. د یوې سرچینې په وینا، د نیول کیدو لامل “د ښځې له محرم پرته دوکان ته ننوتل” یا “د دوکاندار ږیره خریل” وو.
په کندهار کې د طالبانو دا وروستی اقدام د هغو محدودیتونو په تعقیب دی چې دې ډلې په دې وروستیو کې په ټولنیزو او اقتصادي فعالیتونو او په عامه ځایونو کې د ښځو په حضور، په ځانګړې توګه د هرات په څیر ښارونو کې لګولي دي.