د دید خبري اژانس: د امریکا د ترهګرۍ ضد ملي مرکز استعفا ورکړي مشر جو کنټ د سپینې ماڼۍ پر پالیسیو نیوکه وکړه او اعلان یې وکړ چې متحده ایالات باید اسراییل کنټرول کړي، که نه نو له ایران سره تاوتریخوالی به په خطرناکه توګه زیات شي.
کنټ، چې په دې وروستیو کې یې د واشنګټن د ایران پر وړاندې د پوځي عملیاتو د پیل کولو پریکړې په اعتراض کې له خپلې دندې استعفا ورکړه، په ایکس شبکه کې په یوه پیغام کې ټینګار وکړ: “د تاوتریخوالي کمولو لپاره لومړی ګام د اسراییلو کنټرول دی؛ که نه نو، هر ډول ډیپلوماتیک هڅې به د اسراییلو د نویو بریدونو له امله ویجاړې شي او د جګړې پروسه به ګړندۍ شي.”
هغه دا هم روښانه کړه چې ایران د متحده ایالاتو لپاره سمدستي ګواښ نه و او د دې شخړې پیل د اسراییلو او په واشنګټن کې د هغې د ځواکمنو لابیانو د فشار پایله وه.
د ترهګرۍ ضد ملي مرکز د امریکا ملي استخباراتو د رییس د دفتر د جوړښت یوه برخه ده، چې اوس مهال د تولسي ګابارډ تر مدیریت لاندې فعالیت کوي.
دا څرګندونې په داسې حال کې کیږي چې متحده ایالاتو او اسراییل د فبروري له ۲۸مې راهیسې د ایران پر وړاندې ګډ پوځي عملیات پیل کړي دي، چې د تهران په ګډون یې په څو لویو ښارونو بریدونه کړي دي، دا هغه اقدام دی چې په سیمه کې د شخړو د خپریدو په اړه یې اندیښنې ډیرې کړي دي.