د دید خبري اژانس: د مرکزي اسیا د هېوادونو د مشرانو اوومه مشورتي غونډه په تاشکند کې د سیمې د شپږو هېوادونو د مشرانو په ګډون سره پیل شوه؛ د غونډې اصلي تمرکز په افغانستان کې د پرمختګونو بیاکتنه او په مرکزي اسیا کې د اقتصادي، سیاسي او امنیتي همکاریو د پیاوړتیا لارې چارې دي.
میرضیایف: د منځنۍ اسیا ثبات د افغانستان پرته ممکن نه دی
تاشکند نن، شنبه، د عقرب ٢٤، د مرکزي اسیا د هېوادونو د مشرانو اوومه مشورتي غونډه کوربه توب وکړ؛ دا غونډه، چې د سیمې د شپږو هېوادونو د مشرانو په ګډون سره پیل شوه او د څو اړخیزو همکاریو په پیاوړتیا او په افغانستان کې د پرمختګونو بیاکتنې باندې متمرکزه وه.
دا دوه ورځنۍ غونډه د مرکزي اسیا د هېوادونو ترمنځ د اقتصادي، سیاسي او امنیتي همکاریو د پراخولو په هدف ترسره کیږي او تمه کیږي چې په پای کې به د همکارۍ څو مهم سندونه تصویب شي.
د ازبکستان ولسمشر شوکت میرضیایف، چې لومړی ځل یې په ۲۰۱۷ کال کې د ملګرو ملتونو په عمومي اسامبله کې د دې غونډو د ترسره کولو نوښت وړاندیز وکړ، د غونډې له پیل څخه مخکې ټینګار وکړ چې په مرکزي آسیا کې دوامداره سوله د افغانستان د وضعیت په پام کې نیولو پرته نشي ترلاسه کیدی.
د اعلان شوي اجنډا له مخې، سیمه ییز مشران به د اقتصادي همکارۍ د پیاوړتیا، د ګډو زیربنایي پروژو د پراختیا، امنیتي همغږۍ، او همدارنګه د مهمو نړیوالو پرمختګونو د ارزونې په لارو چارو نظرونه تبادله کړي.
د دې سیمه ییز نوښت له پیل راهیسې، یوازې د ازبکستان د ولسمشرۍ په وروستۍ دوره کې په مختلفو برخو کې له ۲۰ څخه زیاتې مهمې بین الحکومتي غونډې ترسره شوې دي، چې د همکارۍ او ګډو خبرو اترو لپاره د میکانیزمونو د پیاوړتیا لپاره د مرکزي آسیا هیوادونو هوډ څرګندوي.
د مرکزي آسیا د مشرانو مشورتي غونډه به تر سبا (یکشنبه) پورې دوام وکړي.