د امریکا محکمه: د سپتمبر ١١ پیښې قربانیان د افغانستان د بهرنیو اسعارو شتمنیو ته لاسرسی نه شي لرلی
د دید خبري اژانس: د امریکا د استیناف محکمې پریکړه کړې چې د سپتمبر ١١مه بریدونو او په ختیځ افریقا کې د امریکا په سفارتونو باندې د ترهګریزو بریدونو قربانیان د افغانستان د کنګل شویو بهرنیو اسعارو زیرمو یوې برخې ته د لاسرسي حق نلري.
د امریکا د استیناف محکمې په یوه نوي پریکړه کې، د سپتمبر ١١مه ترهګریزو بریدونو او په ختیځ افریقا کې د امریکا په سفارتونو باندې د بریدونو قربانیان به د افغانستان د مرکزي بانک د ۳.۵ ملیارد ډالرو کنګل شویو شتمنیو ته لاسرسی ونلري.
دا اندازه د افغان بهرنیو اسعارو د ۷ ملیارد ډالرو نیمایي برخه ده چې د نیویارک فدرالي زیرمو لخوا د پخواني حکومت له سقوط او د ۲۰۲۱ کال په اګست کې د سرپرست حکومت لخوا د کابل له نیولو وروسته کنګل شوې وې.
د امریکا پخواني ولسمشر جو بایډن، د ۲۰۲۲ کال په فبروري کې په یوه اجرایوي فرمان کې، دا شتمنۍ په دوو برخو وویشلې: نیمایي د افغانستان خلکو ته د بشري مرستو لپاره او پاتې نیمایي د امریکایی مدعیانو لخوا د قانوني اجرااتو لپاره.
خو، د محکمې یوې وروستۍ پریکړې دا هیله پای ته ورسوله، او اعلان یې وکړ چې د دې پیسو څخه هیڅ یو د ترهګریزو بریدونو قربانیانو ته د پیسو ورکولو لپاره نشي کارول کیدی.