دید خبرې آژانس: د افغانستان د سولې لپاره د امریکا پخواني استازي زلمي خلیلزاد ویلي، چې د امریکا یوه بندي وګړې د اسلامي امارت له بنده ازاده شوې ده.
دغه بندۍ فې ډي هال نومېږي او د زلمي خلیلزاد په وینا، اوسمهال په کابل کې د امریکا د قطري ملګرو تر نظر لاندې ده.
امریکایۍ وګړې فې ډي هال وايي:«ښاغلی ولسمشره ما تاسو ته دوه ځلې رایه درکړه؛ خو ډېره خوشحاله یم، چې تاسو اوس په ولسمشرۍ ماڼۍ کې یاست. دا یوه نوې دوره ده او زه خوشحاله یم، چې تاسو ولسمشر یاست. زه له تاسو منندویه یم، چې بېرته مو کور ته راستنه کړم او زه هېڅکله پر خپل امریکایتوب دومره نهوم ویاړېدلې.»
تېره ورځ، د افغان سولې لپاره د امریکا د بهرنیو چارو وزارت پخواني ځانګړي استازي زلمي خلیلزاد د دغې امریکایۍ وګړۍ د خوشې کېدو خبر ورکړی او ویلي یې دي، چې نوموړې د امریکا له قطري ملګرو سره په کابل کې ده او ژر به بېرته خپل هېواد ته ستنه شي.
که څه هم اسلامي امارت تر اوسه د دغې امریکایۍ ښځې په تړاو چې د سرپرست حکومت په بند کې وه، څه نهدي ویلي؛ خو تر دې وړاندې یې رایان کوربت او جورج ګلېزمن د امریکا پر وړاندې د ښه نیت په توګه له بنده خوشې کړي وو.
