مجاهد: د سفارتونو د پرانیستلو لپاره خبرې روانې دي
دید خبرې آژانس: د اسلامي امارت ویاند ذبیحالله مجاهد له العربیه شبکې سره په مرکه کې ویلي، چې سرپرست حکومت ته په واشنګټن کې د افغانستان سفارت د سپارلو او په کابل کې د امریکا سفارت د بیا پرانیستلو په اړه خبرې روانې دي.
ښاغلی مجاهد زیاتوي، چې دغه دوه مسایل کابل ته له راغلي امریکايي پلاوي سره شریک شوي او سرپرست حکومت په دې برخه کې د واشنګټن ځواب ته په تمه دی.
د اسلامي امارت ویاند العربیه ته ویلي:«په امریکا کې د افغان سفارت د سپارلو په اړه خبرې روانې دي. دا د خبرو او هوکړې پیل دی. لکه څنګه چې خبر یاست، کابل ته راغلی پلاوی له ځینو مسایلو سره امریکا ته ستون شو. و به لیدل شي، چې د امریکا راتلونکي اقدامات به څه وي.»
د اسلامي امارت ویاند د خپلو خبرو په یوه بله برخه کې ویلي، چې سرپرست حکومت له امریکا سره د جګړې او دښمنۍ فصل تړلی او له دغه هېواد سره د ښو اړیکو غوښتونکی دی. هغه له امریکا غواړي، چې په کابل کې د خپل سفارت له پرانیستلو سره د کابل او واشنګټن ترمنځ د باور او اړیکو فضا رامنځته کړي.
ذبیحالله مجاهد زیاته کړې:«موږ په کابل کې د امریکا له سفارته هم غواړو، چې خپل فعالیتونه بېرته پیل کړي، چې د دواړو هېوادونو ترمنځ اړیکې او تفاهم رامنځ ته شي او هغوی د ډیپلوماسۍ له لارې د باور وړ همکارۍ ته ورسېږي، چې د دواړو هېوادونو ګټې خوندي کړي.»
که څه هم په امریکا کې د ډانلډ ټرمپ د حکومت له واکمنېدو سره، د افغانستان د سرپرست حکومت په اړه د دغه هېواد تګلاره روښانه نهوه؛ خو کابل ته د امریکايي پلاوي له سفر او د اسلامي امارت له زندانه د یو امریکايي وګړي له خلاصون سره ظاهراً د کابل او واشنګټن په اړیکو کې یو نوی باب د پرانیستل کېدو په حال کې دی.
