دید خبرې آژانس: اقتصاد وزارت وايي، د ډانالډ ټرمپ حکومت له لوري د امریکا د پراختیايي ادارې یا یو اس اې ای ډي ۸۳ سلنې بودیجې لغوه کول به اړمنو ته پر مرستو رسولو منفي اغېز وکړي.
د دغه وزارت ویاند، عبدالرحمن حبیب ټینګار کړی، چې له بشر پالو پروګرامونو باید سیاسي ګټه وانخیستل شي.
عبدالرحمن حبیب هم وايي: “د بشري مرستو موخه د بېړنیو حالتونو، طبیعي پېښو او هغو کسانو ملاتړ دی چې اقتصادي زیانونه یې لیدلي دي. د بشري قوانینو پر بنسټ، بېطرفي او د انساني کرامت درناوی د دې مرستو اساسي اصول دي، نو ځکه سازمانونه او هېوادونه باید له دغو مرستو د سیاسي موخو د ترلاسه کولو لپاره استفاده ونه کړي.”
دا په داسې حال کې ده، چې هره ورځ د بېلابېلو بنسټونو له لوري د افغانستان د بشري ناورین، بې وزلۍ او اقلیمي بدلونونو په تړاو اندېښنې څرګندېږي.
د امریکا د نړۍوالې پراختیا اداره له ۶۳ کلونو راهیسې له نورو هیوادونو سره بشري او پرمختیایي مرستې کوي او په ډیری نړیوالو پروژو کې یې رغنده رول لوبولی دی.
