قانع: په هیواد کې هېڅ ګواښ رامنځته کوونکې ډله نشته
دید خبرې آژانس: د کورنیو چارو وزارت د هغو نړۍوالو سازمانونو اندېښنې ردوي چې وايي ګواکې، په افغانستان کې داسې ډلې شته چې سیمې او نړۍ ته ګواښ پېښوي.
د کورنیو چارو وزارت ویاند عبدالمتین قانع، د افغانستان امنیتي وضعیت د تېرې یوې لسیزې پرتله بېساری ګڼي.
هغه زیاتوي، چې د ترهګرو ډلو کوچني او واړه فعالیتونه د افغانستان له پولو بهر د سیمې په هېوادونو کې پلان شوي دي.
د کورنیو چارو وزارت ویاند په دې هکله وویل:«د افغانستان اسلامي امارت د هېواد پر ټوله ځمکه مطلقه واکمني لري او هېڅ کس او یا ډلې ته اجازه نهورکوي، چې د هېواد امنیت خراب کړي. د ځينو نړۍوالو سازمانونو او بنسټونو او یا هم د نړۍوالو او ګاونډیو هېوادونو اندېښنې، چې ګواکې د افغانستان له خاورې هغوی ته امنیتي ګواښونه متوجه دي، بېځایه او بې بنسټه دي او موږ دغه موضوع په بشپړه توګه ردوو.»
ورته مهال، ټاکل شوې، سبا د دا/عش د ګواښونو په تړاو د ملګرو ملتونو د امنیت شورا ځانګړې غونډه جوړه شي. په دې غونډه کې د ملګرو ملتونو د سرمنشي شپږ میاشتنی راپور چې په یوه برخه کې د داعش خراسان څانګه د افغانستان لپاره یو جدي ګواښ بلل شوې، هم ارزول کېږي.
بلخوا، په اسلاماباد کې د روسیې سفیر ویلي، مسکو د ترهګرۍ پر وړاندې مبارزه کې د افغانستان له اقداماتو ملاتړ کوي. آلبرټ خوروف زیاته کړې، چې هېواد یې له افغانستان او پاکستان سره د رغنده همکاریو پیاوړتیا ته ژمن دی.
په اسلاماباد کې د روسیې سفیر ویلي:«په افغانستان کې د سولې او ټيکاو پیاوړتیا او د دغه هېواد له خاورې د ترهګریزو ګواښونو پر وړاندې مبارزه په سیمه کې زموږ له ګډو ګټو سره اړخ لګوي.»
له دې مخکې، سیګر هم په یوه راپور کې ویلي و چې په ۲۰۲۴ کال کې د داعش بریدونه زیات شوي او د دې ډلې خراسان څانګه افغانستان، ایران، ترکیې، پاکستان او روسیې ته ګواښ بلل کېږي.
خو اسلامي امارت دا راپور د دا/عش ډلې لپاره تبلیغ بللی و.
