د دید خبري اژانس: د پاکستان د درملو صادرات د ۲۰۲۶-۲۰۲۷ مالي کال په لومړۍ ربع کې ۲۵.۵۳٪ کم شوي او ۷۳.۳۰ ملیون ډالرو ته رسیدلي دي؛ دا بهیر، د صنعت فعالینو په وینا، په عمده توګه د افغانستان سره په سوداګرۍ کې د خنډونو له امله دی، چې د پاکستاني درملو لپاره یو له اصلي بازارونو څخه دی.
د پاکستان د احصایې ادارې په وینا، د ۲۰۲۵-۲۰۲۶ مالي کال کې د هیواد د درملو صادراتو ارزښت هم ۳۰.۲۶٪ کم شوی، چې له ۴۵۷.۴۵ ملیون ډالرو څخه ۳۱۹ ملیون ډالرو ته رسیدلی.
همدارنګه، د روان مالي کال په لومړۍ ربع کې د پاکستان د درملو صادراتو حجم ۳۱.۴٪ کم شوی، چې له شاوخوا ۲۳،۹۲۴ ټنو څخه ۱۶،۴۱۰ ټنو ته رسیدلی.
افغانستان پخوا د پاکستاني درملو لپاره یو له لویو بازارونو څخه ګڼل کیده. د پاکستان د سوداګرۍ پراختیا ادارې د درمل جوړونې پورټال د معلوماتو له مخې، هیواد په ۲۰۲۴-۲۰۲۵ مالي کال کې افغانستان ته شاوخوا ۱۵۵.۶۸ ملیون ډالرو په ارزښت درمل صادر کړي، چې په هغه کال کې د پاکستان د ټولو درملو صادراتو نږدې ۳۴ سلنه جوړوي.
ډاون راپور ورکړ، د پاکستان د درملو جوړونکو ټولنې پخواني مشر توقیر الحق وویل چې د افغانستان سره د سوداګرۍ ځنډول د درملو شرکتونو او د پاکستان د حکومت عوایدو ته درانه زیانونه اړولي دي. د هغه په وینا، افغان ناروغان هم له دې وضعیت څخه اغیزمن شوي او اړ شوي چې ډیر ګران درمل واخلي.
هغه زیاته کړه چې ټولنې افغانستان ته د درملو صادراتو د بیا پیلولو مسله د پاکستان حکومت سره راپورته کړې او د هیواد د پلان وزیر احسن اقبال ژمنه کړې چې د دې ستونزې د حل لپاره به له اړوندو چارواکو سره خبرې وکړي؛ خو تر اوسه پورې په دې برخه کې کوم جدي تعقیب نه دی شوی.
په عین حال کې، د پاکستان د جراحي توکو او طبي تجهیزاتو صادرات، چې د درملو صادراتو په احصایو کې نه شمیرل کیږي، د ۲۰۲۶-۲۰۲۷ مالي کال په لومړۍ ربع کې ۸.۸ سلنه وده کړې او ۱۲۱ ملیون ډالرو ته رسیدلي دي.