د دید خبري اژانس: د چین لومړي وزیر لي چیانګ د تاجکستان له ولسمشر امام علي رحمان سره په کتنه کې د ترهګرۍ، افراطیت او بېلتون غوښتنې سره د مبارزې لپاره د دواړو هېوادونو ترمنځ د امنیتي او استخباراتي همکارۍ د پراخولو غوښتنه وکړه او په تاجکستان کې د چینايي اتباعو او شرکتونو د ساتنې پر اړتیا یې ټینګار وکړ.
دا غونډه د شانګهای همکارۍ سازمان د هېوادونو د مشرانو شورا په غونډه کې د ګډون لپاره د چین د لومړي وزیر د رسمي سفر په ترڅ کې په دوشنبه کې وشوه.
لي چیانګ د معلوماتو د تبادلې، امنیتي همغږۍ او د قانون پلي کولو په برخه کې د همکارۍ پر زیاتوالي ټینګار وکړ. د وسله والو ډلو د فعالیتونو او له افغانستان څخه منځنۍ آسیا ته د ناامنۍ د خپریدو احتمال په اړه د بیجینګ اندیښنه د تاجکستان سره د همکارۍ لپاره د چین د علاقې مهم عوامل دي.
چین او تاجکستان مخکې د سرحدي امنیت په برخه کې همکاري کړې ده. بیجینګ په تاجکستان کې د خپلو اتباعو او شرکتونو د ساتنې لپاره د نورو اقداماتو غوښتنه هم کړې ده.
د امنیتي مسلو سربیره، دواړو خواوو د اقتصادي همکارۍ، زیربناوو پراختیا، کانونو، ډیجیټل اقتصاد او مصنوعي ځیرکتیا د پراخولو په اړه هم بحث وکړ.