د دید خبري اژانس: د روسیې د بهرنیو چارو وزیر سرګي لاوروف خبرداری ورکړی چې په منځني ختیځ کې وضعیت د بشپړې جګړې په درشل کې دی؛ خو د هغه په وینا، د امریکا او ایران ترمنځ د اسلام آباد د تفاهم یادښت کولی شي د ډیپلوماسۍ لارې ته د وضعیت د بیرته راګرځولو لپاره لاره هواره کړي.
لاوروف د روسیې او خلیج همکارۍ شورا د ستراتیژیکو خبرو اترو د نهم پړاو وروسته په یوه مطبوعاتي کنفرانس کې وویل: “موږ باور لرو چې دا یادښت لاهم ټول اړین عناصر لري ترڅو اوسنی وضعیت، چې د بشپړې جګړې په درشل کې دی، د خبرو اترو سیاسي او ډیپلوماتیک لارې ته بدل کړي.”
هغه د هرمز تنګي او شاوخوا سیمو کې د کړکیچونو اصلي ریښو ته د رسیدو اړتیا باندې هم ټینګار وکړ او د اسلام آباد د تفاهم یادښت په چوکاټ کې یې د متحده ایالاتو او ایران ترمنځ د تړونونو د پلي کولو غوښتنه وکړه.
د روسیې د بهرنیو چارو وزارت دا هم اعلان کړی چې لاوروف به نن، د میزان په ۲۷مه، تهران ته د خپل کاري سفر په جریان کې د ایران له ولسمشر مسعود پزشکیان سره وګوري او د ایران د بهرنیو چارو له وزیر عباس عراقچي سره به د دوه اړخیزو مسلو او سیمه ییزو پرمختګونو په اړه نظرونه تبادله کړي.