چین له طالبانو څخه غوښتنه کوي چې د ترهګرو ډلو پر وړاندې عملي اقدامات وکړي

د دید خبري اژانس: د چین د بهرنیو چارو وزیر وانګ یي د طالبانو د حکومت له چارواکو څخه غوښتنه کړې چې په افغانستان کې د فعالو ترهګرو ډلو پر وړاندې عملي اقدامات وکړي او خبرداری یې ورکړ چې د افغانستان ثبات د ټولې آسیا له امنیت سره تړلی دی.

وانګ دا څرګندونې د پنجشنبې په ورځ، د اکتوبر په ۱۵مه، د اذربایجان په پلازمینه باکو کې د آسیا د تعامل او باور جوړونې د اقداماتو (CICA) د اوومې سرمشریزې په مراسمو کې وکړې.

هغه افغانستان د آسیا د امنیتي جوړښت یوه مهمه برخه وګڼله او د تلپاتې سولې او ثبات، د سیمې د هیوادونو ترمنځ د زیاتې همغږۍ او د افغانستان د اقتصادي پراختیا او بشري اړتیاوو لپاره د دوامداره ملاتړ ډاډمن کولو اړتیا باندې یې ټینګار وکړ.

چین په مکرر ډول له طالبانو څخه غوښتنه کړې چې د ختیځ ترکستان اسلامي غورځنګ (ETIM) پر وړاندې اغیزمن اقدامات وکړي، کوم چې بیجینګ د خپل ملي امنیت لپاره ګواښ ګڼي.

د طالبانو حکومت په مکرر ډول ټینګار کړی چې اجازه به ورنکړي چې د افغانستان خاوره د نورو هیوادونو پر وړاندې وکارول شي.

په ورته وخت کې، د CICA سرمشریزه د طالبانو له استازي پرته ترسره شوه؛ یوه مسله چې یو ځل بیا یې په دې سازمان کې د افغانستان ناڅرګنده ډیپلوماتیک دریځ روښانه کړ.