د دید خبري اژانس: د سیاسي چارو په اړه د پاکستان د لومړي وزیر سلاکار وايي چې اسلام آباد حق لري چې په افغان خاوره کې د وسله والو ډلو روزنیز کمپونه او ځایونه په نښه کړي چې پاکستاني چارواکي ادعا کوي چې په هیواد کې له ترهګریزو بریدونو سره تړاو لري.
رانا ثناالله ویلي دي چې د طالبانو د حکومتي چارواکو سره د خبرو اترو په جریان کې، د هیواد چارواکو د هغو ترهګریزو بریدونو شواهد وړاندې کړي دي چې په افغانستان کې پیل کیږي.
هغه ادعا کړې ده چې په دې خبرو اترو کې افغان لوري د پاکستان پر وړاندې د افغان خاورې د کارولو د مخنیوي لپاره تضمین نه دی ورکړی.
د پاکستان د لومړي وزیر سلاکار ټینګار کړی چې اسلام آباد حق لري چې د امنیتي ګواښونو او ترهګریزو بریدونو په وړاندې له ځانه دفاع وکړي او د وسله والو ډلو موقعیتونه او روزنیز کمپونه خپل احتمالي هدفونه ګڼي.
ثناالله د عمران خان په مشرۍ د تحریک انصاف ګوند هم د پاکستان د ملي امنیت په پرتله د سیاسي ګټو لومړیتوب ورکولو تورن کړی دی.