یمن د ریاض او جنوبي سعودي هوايي ډګرونو باندې توغندي توغولي
د دید خبري اژانس: د يمن وسله والو ځواکونو اعلان وکړ چې د بريدونو په يوه نوې څپه کې يې په رياض کې د ملک خالد نړيوال هوايي ډګر، نجران هوايي ډګر او خمیس مشيط هوايي اډه د کروز او باليستيک توغندیو په واسطه په نښه کړې ده.
د يمن د وسله والو ځواکونو د وياند يحيی سريع د يوې اعلاميې له مخې، د ملک خالد هوايي ډګر په دوو کروز توغندیو او نجران هوايي ډګر او خمیس مشيط هوايي اډه په دوو باليستيک توغندیو په نښه شوې ده. دغو بريدونو هوايي ټرافيک ګډوډ کړی او هدفونو ته يې زيان رسولی دی.
په ورته وخت کې، د يمن ځواکونو ته نږدې سرچينو د يمن په مختلفو سيمو کې د سعودي ائتلاف سره په ګډه د ځواکونو په غونډو باندې د پراخو توغندیو بريدونو راپور ورکړی دی، په شمول د الجوف، راس العره، قاوه اډې، السقيه، المضاربه او د باب المندب شاوخوا سيمو. دغو سرچينو په دې بريدونو کې د توغول شويو توغنديو شمېر لږ تر لږه ۱۵ ښودلی او ادعا يې کړې چې د العمالقه ځواکونو د ۱۳مې کنډک له ۳۰ څخه زيات غړي وژل شوي او ټپيان شوي دي.
د یمن د وسله والو ځواکونو ویاند د سعودي هوايي شرکتونو او د تیلو د تاسیساتو کارمندانو ته هم خبرداری ورکړی چې د هیواد له هوایی ډګرونو او د تیلو د تاسیساتو څخه لرې پاتې شي.
له بلې خوا، د یمن په سویل کې د ځمکنیو پرمختګونو څخه خپاره شوي راپورونه ښیي چې د صنعا ځواکونه د سویلي تعز په المسراخ او جبل حبشي په ځینو برخو کې پرمختګ کوي. دې ځواکونو ته نږدې سرچینو ادعا کړې چې د دې دواړو ادارو سیمې د یمني ځواکونو تر کنټرول لاندې راغلې دي او د جبل حبشي څوکه هم نیول شوې ده.
په مقابل کې، د سعودي په مشرۍ ایتلاف جنګي الوتکو د صنعا حکومت تر کنټرول لاندې سیمو باندې هوايي بریدونه ته دوام ورکړي. په دې بریدونو کې د پاکستاني جنګي الوتکو د ګډون په اړه ادعاوې هم د مختلفو سرچینو لخوا شوي دي.