د دید خبري اژانس: د افغانستان د ترانسپورټ او ملکي هوايي چلند وزارت وايي چې تر اوسه پورې په هیواد کې ۵۳۲۷۰ مسافر وړونکي او بار وړونکي موټرونه د تعقیب وسایلو (GPS) سره سمبال شوي دي.
د افغانستان د ترانسپورټ او ملکي هوايي چلند وزارت اعلان کړی چې په هیواد کې د مسافر وړونکو او بار وړونکو موټرو کې د تعقیب وسایلو (GPS) نصبولو پروسه دوام لري.
وزارت وايي چې تر اوسه پورې ۵۳۲۷۰ موټرونه په دې وسایلو سمبال شوي دي او ۲۳ خصوصي شرکتونه د تعقیب وسایلو د نصبولو په برخه کې فعال دي.
د وزارت په وینا، د مسافر وړونکو موټرو لپاره د تعقیب وسایلو نصبول لازمي شوي دي چې په ښارونو کې کار کوي.
چارواکو ویلي چې د دې پلان پلي کولو هدف د ترافیکي پیښو کمول، د موټرو ښه څارنه او د مسافرینو خوندیتوب زیاتول دي.