د دید خبری اژانس: د روسیې د بهرنیو چارو مرستیال وزیر اندری رودنکو اعلان وکړ چې د شمالی کوریا رهبر کیم جونګ اون ته روسیې ته د سفر بلنه ورکړل شوې او د دغه سفر وخت به د ډیپلوماټیکو چینلونو له لارې همغږی شی.
رودنکو تاس ته وویل، روسیه به تل په دغه هیواد کې د شمالي کوریا د رهبر د حضور هرکلی وکړي.
هغه د روسیې او شمالي کوریا ترمنځ د “هر اړخیزو ستراتیژیکو همکاریو” تړون ته هم اشاره وکړه چې د ۲۰۲۴ په جون کې په پیونګ یانګ کې لاسلیک شو، او وویل چې دې تړون د دواړو هیوادونو دودیزې دوستانه اړیکې “د یووالي نوې کچې” ته پورته کړې.
د روسيې د بهرنيو چارو وزارت مرستيال زياته کړه چې د دغه تړون په چوکاټ کې او د دواړو هیوادونو ترمنځ د فعالو خبرو اترو په چوکاټ کې په بېلابېلو برخو کې دوه اړخيزې همکارۍ پراخېږي. د هغه په وينا، د دواړو هیوادونو د بين الحکومتي کمېسيون له لارې سوداګريزې، اقتصادي، علمي او تخنيکي همکارۍ هم پر مخ وړل کېږي.