د بدخشان په فیض آباد کې د بې پیلوټه الوتکو ګزمې زیاتې شوې
د دید خبري اژانس: د بدخشان په مرکز فیض آباد کې د استوګنې پر سیمو د بې پیلوټه الوتکو د الوتنو زیاتوالي د خلکو اندېښنې راپارولي دي. په ورته وخت کې د دغه ښار هوايي ډګر ته څېرمه د بې پيلوټه الوتکو د پېژندنې او ملاتړ مرکز د جوړېدو په اړه راپورونه خپاره شوي دي.
ځايي سرچينې وايي، چې د بې پيلوټه الوتکو د الوتنې اوازونه په ځانګړې توګه د شپې په وروستيو کې د کورنيو د وېرې او اندېښنې لامل شوي دي. ځايي راپورونه وايي، چې د دغو الوتنو موخه د معلوماتو راټولول او څارل او د امنيتي تدابيرو ټينګول دي.
په ورته وخت کې د فيض آباد هوايي ډګر ته څېرمه په يوه پوځي اډه کې د بې پيلوټه الوتکو د ملاتړ او پېژندنې د مرکز د جوړېدو په اړه راپورونه خپاره شوي، خو د طالبانو حکومت تر اوسه د دغه مرکز او د بې پيلوټه الوتکو د فعاليت د جزئياتو په اړه رسمي دريځ نه دی اخيستی.
په بدخشان کې د بې پيلوټه الوتکو د فعاليتونو د زياتوالي خبر په داسې حال کې ورکول کیږي چې دغه ولايت د سرحدي موقعيت او په وروستيو مياشتو کې د امنيتي پرمختګونو له امله د هیواد په شمال ختيځ کې يو له حساسو سيمو څخه بلل کیږي.