د دید خبري اژانس: د طالبانو ویاند ذبیح الله مجاهد په ۱۴۴۷ هجري کال کې د ۳۵۶ زیربنایي او ښاري پروژو د پلي کیدو اعلان وکړ او ویې ویل، چې د طالبانو د فواید عامې او ښار جوړونې او کور جوړونې وزارت دغه پروژې د سړکونو، پلونو، ریل پټلۍ، ښاري پلان جوړونې او د استوګنې د ښارګوټو د جوړولو په برخو کې درلودې.
مجاهد د «مطبوعاتو په هینداره کې د دولتي پروګرام» په اوومه غونډه کې وویل، چې په ۱۴۴۷ هجري کال کې د طالبانو د ټولګټو وزارت په خپل کاري پروګرام کې د سړکونو، پلونو، جوماتونو او اورګاډي پټلۍ په برخو کې ۲۶۲ بنسټیزې او پراختیايي پروژې درلودې، چې له دې جملې څخه ۹۱ پروژې بشپړې او ۱۷۱ پروژې یې د پلي کیدو په حال کې دي.
د هغه په وينا، په دې موده کې د ٣٩٣ کيلومتره سړکونو پخول، د ٩٣٢ کيلومتره فزيبليټي مطالعات، د ٧٧٧ کيلومتره توپوګرافيک مطالعات او د ٣٥٠ کيلومتره سړک ډيزاين هم ترسره شوى دى.
د طالبانو ویاند زیاته کړه، چې د دې ډلې د ټولګټو وزارت هم په خپل کاري پروګرام کې په بېلابېلو ولایتونو کې د سړکونو او پلونو د بیارغونې، ساتنې او مراقبت ۱۱۰ پروژې درلودې، چې ۲۵ پروژې یې بشپړې شوې دي.
مجاهد زیاته کړې، چې د طالبانو د ښار او کور جوړونې وزارت تېر کال ۹۴ ښاري پلانونه ترتیب او منظور کړي دي. په دې پلانونو کې ماسټر پلانونه، ستراتیژیک او مفصل پلانونه، د مهاجرینو د اوسیدو پلانونه، ښاري وده او د زیربناوو شبکې شاملې دي.
هغه زياته کړه، چې د “نوي کابل” پروژې ماسټر پلان او د دې پروژې د لومړي پړاو د جوړولو پلان هم تیر کال منظور شوى و.
د مجاهد په وينا، د طالبانو د ښار او کور جوړونې وزارت د افغانستان په بېلابېلو سيمو کې د لسو پروژو د جوړولو عملي کار پيل کړى دى.