د دید خبري اژانس: د ملګرو ملتونو عمومي منشي انتونیو ګوتریش د افغان ښځو او نجونو پر وړاندې د طالبانو د حکومت د دوامداره تبعیضي پالیسیو په اړه اندیښنه څرګنده کړه او د هغوی پر وړاندې د لګول شویو محدودیتونو د سمدستي لرې کولو غوښتنه یې وکړه.
د ښځو پر وړاندې د محدودیتونو د لومړۍ کلیزې په مناسبت په یوه اعلامیه کې ویل شوي چې په ټول هیواد کې د ملګرو ملتونو په دفترونو کې د افغان ښځو د ننوتلو له بندیز څخه یو کال تیر شوی دی؛ یو محدودیت چې د ملګرو ملتونو په وینا، د نړیوال قانون خلاف دی او د بشري مرستو د چمتو کولو لپاره د سازمان وړتیا کموي.
ګوتریش ټینګار وکړ: “عمومي منشي له چارواکو څخه غوښتنه کوي چې سمدلاسه په ملګرو ملتونو کې د افغان ښځو پر کار بندیز لرې کړي او د ملګرو ملتونو دفترونو ته د دوی خوندي او بې خنډه لاسرسی ډاډمن کړي.”
هغه د ښځو او نجونو پر وړاندې د ټولو محدودیتونو د لرې کولو او په افغان ټولنه کې د دوی د بشپړ، مساوي او معنی لرونکي ګډون ډاډمن کولو غوښتنه هم وکړه.