د دید خبري اژانس: د طالبانو د حکومت ویاند ذبیح الله مجاهد وویل چې اروپايي هیوادونو د کورنیو اقتصادي ستونزو او فشارونو له امله افغانستان ته خپلې بشري مرستې کمې کړې دي.
مجاهد په یوه غونډه کې وویل چې د طالبانو حکومت هڅه کوي چې په بهرنیو مرستو د افغانستان تکیه کمه کړي او د هیواد د اړتیاوو د پوره کولو لپاره کورني ظرفیتونه پیاوړي کړي.
دا څرګندونې په داسې حال کې وشوې چې نړیوالو سازمانونو په افغانستان کې د بشري پروګرامونو لپاره د تمویل کې د پام وړ کمښت راپور ورکړ. د ناروې د کډوالو شورا د راپور له مخې، د دې پروګرامونو لپاره د تمویل کچه په ۲۰۲۱ کال کې له شاوخوا ۹۶ سلنې څخه په ۲۰۲۶ کال کې ۲۶ سلنې ته راټیټه شوې ده.
د مالي سرچینو کمښت د دې لامل شوی چې یو شمیر مرستندویه سازمانونه د حیاتي خدماتو چمتو کول محدود کړي، پشمول د خوړو، څښاک اوبو، سرپناه او طبي خدماتو ویش.
افغانستان د نړۍ له یو له لویو بشري بحرانونو سره مخ دی، چې په ملیونونو خلک د خوړو له ناامنۍ او اساسي خدماتو ته د محدود لاسرسي سره مخ دي. په داسې حالت کې، د بهرنیو مرستو کمول به په زیان منونکو کورنیو نور فشار راوړي.