د دید خبري اژانس: د پاکستان امنیتي سرچینې وايي چې د تحریک طالبان پاکستان (ټي ټي پي) ۱۵ غړي د شمالي وزیرستان په غلام خان سیمه کې هغه مهال ووژل شول چې له افغانستان څخه پاکستان ته د ننوتلو هڅه یې کوله.
د پاکستان امنیتي سرچینو اعلان کړی چې د هیواد ځواکونو د چهارشنبې په ورځ د شمالي وزیرستان په غلام خان سرحدي سیمه کې د تحریک طالبان پاکستان (ټي ټي پي) ۱۵ غړي ووژل.
د دې سرچینو په وینا، وژل شوي کسان هغه مهال په نښه شول چې له افغانستان څخه پاکستان ته د ننوتلو هڅه یې کوله او د دې ډلې ټول ۱۵ غړي د عملیاتو په جریان کې ووژل شول.
پاکستاني چارواکو دا هم ویلي چې په سیمه کې د تصفیې عملیات له نښتې وروسته دوام درلود.
اسلام آباد په وروستیو کلونو کې په مکرر ډول ټي ټي پي د افغانستان له خاورې څخه په پاکستان کې د بریدونو په تنظیمولو او ترسره کولو تورن کړی دی؛ هغه تور چې افغان طالبان یې ردوي.
د وسله والو ډلو د فعالیتونو په اړه تاوتریخوالی د کابل او اسلام آباد ترمنځ د شخړې یو له اصلي عواملو څخه دی او د دواړو هیوادونو ترمنځ په سرحدي اړیکو یې هم سیوری غوړولی دی.