د دید خبري اژانس: د پاکستان د بهرنیو چارو وزارت اعلان کړی چې له کابل سره یې په اړیکو کې معنی لرونکی پرمختګ د تحریک طالبان پاکستان (ټي ټي پي)، بلوچستان لبریشن آرمی (BLA) او په افغانستان کې میشتو نورو ترهګرو ډلو پر وړاندې د طالبانو لخوا د “معتبر او تایید وړ” اقداماتو پورې مشروط دی.
د پاکستان د بهرنیو چارو وزارت ویاند طاهر اندرابي په خپل وروستي اونیز کنفرانس کې وویل چې اسلام آباد د افغانستان په مسله کې د چین د رغنده او دوامداره رول هرکلی کوي، مګر بهرنۍ منځګړیتوب د ترهګرو زیربناوو پر وړاندې د کابل د اقدام ځای نشي نیولی.
هغه ټینګار وکړ: “د پاکستان او افغانستان په اړیکو کې پرمختګ د افغانستان لخوا په لیکلي او تایید وړ ډاډونو پورې اړه لري چې د دوی خاوره به د پاکستان پر وړاندې د ترهګرۍ لپاره ونه کارول شي.”
دا څرګندونې په داسې وخت کې راغلې چې د کابل او اسلام آباد ترمنځ د تاوتریخوالي کمولو لپاره د چین ډیپلوماټیکې هڅې زیاتې شوې دي. د پاکستان د بهرنیو چارو وزارت ویاند هم د هیواد په ملي دفاع پوهنتون کې د طالبانو د سفیر شتون د ښه اړیکو نښه نه ګڼي، او ویلي یې دي چې دا ډول غونډې د دوه اړخیزو اړیکو اندازه نه ده.
اسلام آباد همدارنګه د سرحدي سیمو څخه د ټي ټي پي جنګیالیو لیږدول کافي نه ګڼي او د دې ډلې د قوماندې، روزنې او لوجستیکي شبکو د له منځه وړلو غوښتنه کوي.