د دید خبري اژانس: د هیواد د خپلواکۍ د ۳۵ کلیزې په مراسمو کې، د ازبکستان ولسمشر شوکت میرضیایف افغانستان یو “نږدې ګاونډی” وباله او د کابل په وړاندې یې د تاشکند د “رغنده او پرېکنده” پالیسۍ په دوام ټینګار وکړ. دا تګلاره د اقتصادي همکارۍ، ښه ګاونډیتوب او سیمه ایزې اړیکې پراخولو پر بنسټ ولاړه ده.
د ازبکستان د خپلواکۍ د ۳۵ کلیزې په مناسبت په خپله وینا کې، میرضیایف وویل چې د هغه د هیواد بهرنۍ پالیسي به د ښه ګاونډیتوب، سیمه ایزې همکارۍ او د سیمې له هیوادونو سره د اقتصادي اړیکو پراختیا پر بنسټ وي.
هغه د طالبانو د حکومت په وړاندې د تاشکند د راتلونکو پلانونو په اړه جزئیات ورنکړل، مګر د دې پالیسۍ د دوام ټینګار ښیي چې افغانستان لاهم د ازبکستان په سیمه ایز چلند کې مهم ځای لري.
په وروستیو کلونو کې، ازبکستان له طالبانو سره خپلې اقتصادي او سیاسي اړیکې پراخې کړې او د مرکزي آسیا او سویلي آسیا ترمنځ د سیمه ایزې اړیکې پلانونو ملاتړ یې کړی دی. سره له دې چې تاشکند په رسمي ډول طالبان نه پیژني، د دې ډلې له حکومت سره پراخې عملي او اقتصادي اړیکې لري.
د احصایو له مخې، د روان کال په لومړیو شپږو میاشتو کې د افغانستان او ازبکستان ترمنځ سوداګري شاوخوا ۱ ملیارد ډالرو ته رسیدلې. دواړه هیوادونه د انرژۍ، ټرانسپورټ او سیمه ایزې سوداګرۍ په برخو کې هم همکاري کوي.