د دید خبري اژانس: په هرات کې د طالبانو والي نور احمد اسلام جار د صنایعو او کانونو د ولایتي خونې د ودانۍ د پرانیستې په مراسمو کې اعلان وکړ چې په هرات کې د ټاپي ګازو د لیږد پروژه به په راتلونکو دوو میاشتو کې بشپړه شي.
هغه وویل چې د ترکمنستان چارواکو د پروژې اړونده برخه بشپړه کړې او له هغې وروسته به کار د هرات چارواکو ته وسپارل شي.
اسلام جار د صنعتي ښارګوټي له خلکو او فابریکو مالکینو څخه هم وغوښتل چې د ګازو د پایپ لاین د پروسې د پیل لپاره همدا اوس اړین چمتووالی ونیسي.
په سیمه کې د انرژۍ د یوې لویې پروژې په توګه، د ټاپي پروژه ټاکل شوې ده چې افغانستان د ترکمنستان، پاکستان او هند د طبیعي ګازو د لیږد شبکې سره وصل کړي او د هرات ولایت او د هیواد په نورو برخو کې د اقتصادي او صنعتي پراختیا لپاره لاره هواره کړي.