د دید خبري اژانس: د طالبانو د سرحدونو، قبایلو او قومونو وزیر خبرداری ورکړ چې افغانستان باید بیا د جګړې او ناامنۍ په دوره کې داخل نشي او د ډلې له مخالفینو یې وغوښتل چې د جګړې د دوام پر ځای د سولې او همکارۍ لاره غوره کړي.
د طالبانو د سرحدونو، قبایلو او قومونو وزیر نورالله نوري په افغانستان کې د څو لسیزو جګړې تجربې ته په اشارې سره وویل چې د دې هیواد خلک د جګړې له دوام څخه ستړي شوي دي او جګړې ته بیرته راستنیدل د خلکو لپاره جدي پایلې لرلی شي.
هغه د طالبانو پر مخالفینو غږ وکړ چې له جګړې، تبلیغاتو او هغو کړنو څخه ډډه وکړي چې د هغه په وینا ناامني زیاتوي او د افغانستان د ستونزو د حل لپاره له غیر نظامي لارو چارو کار واخلي.
نوري دا هم ټینګار وکړ چې مخالفین د بهرنیو هیوادونو د ملاتړ د جلبولو لپاره بیا افغانستان ته د جګړې او بې ثباتۍ فضا ته داخل نه کړي.