د دید خبري اژانس: د پاکستان د لومړي وزیر مرستیال او بهرنیو چارو وزیر اسحاق ډار د شانګهای همکارۍ سازمان د بهرنیو چارو وزیرانو شورا په غونډه کې له دې سازمان څخه وغوښتل چې د طالبانو حکومت دې ته اړ کړي چې د ترهګرۍ سره د مبارزې په برخه کې خپلې ژمنې پوره کړي.
اسحاق ډار په خپله وینا کې ټینګار وکړ چې په سیمه کې د سولې، ثبات او دوامداره اقتصادي پرمختګ ترلاسه کول به د هغو ترهګریزو ګواښونو له منځه وړلو پرته ممکن نه وي چې د هغه په وینا د افغانستان له خاورې څخه سرچینه اخلي.
هغه هیله څرګنده کړه چې د شانګهای همکارۍ سازمان به د طالبانو له حکومت څخه وغواړي چې د نړیوالې ټولنې سره د ترهګرۍ ضد ژمنې پوره کړي او د نړیوالې سولې او امنیت په اړه خپل مسؤلیتونه پوره کړي.
د پاکستان د بهرنیو چارو وزیر دا هم وویل چې د شانګهای همکارۍ سازمان له خپل تاسیس راهیسې د سیمه ییزې همکارۍ لپاره یو مهم پلیټ فارم ګرځیدلی او د غړو هیوادونو ترمنځ یې د سولې، امنیت، ثبات، اقتصادي اړیکو او کلتوري اړیکو په پیاوړتیا کې اغیزمن رول لوبولی دی.