د دید خبري اژانس: د احصایې او معلوماتو ملي ادارې (GSIA) اعلان وکړ چې د ۱۴۰۵ لمریز کال لپاره د افغانستان نفوس ۳۷.۲ میلیونه اټکل شوی دی.
د دې ادارې د احصایو پر بنسټ، د هیواد د نفوس ۵۱ سلنه نارینه او ۴۹ سلنه ښځینه دي. همدارنګه، د نفوس شاوخوا ۷۰ سلنه، چې نږدې ۲۶ میلیونه وګړي سره مساوي دي، په کلیوالي سیمو کې ژوند کوي. ۲۶ سلنه، چې د ۹.۸ میلیونه وګړو سره برابر دي، ښاري اوسیدونکي دي، او نور ۴ سلنه، چې نږدې ۱.۵ میلیونه وګړي دي، کوچیان دي.
د دې اټکل له مخې، کابل ولایت د هیواد تر ټولو ګڼ نفوس لرونکی ولایت دی چې شاوخوا ۶.۴ میلیونه وګړي لري، چې له دې ډلې ۳.۳ میلیونه نارینه او ۳.۱ میلیونه ښځې دي. هرات ولایت د ۲.۴ میلیونه وګړو سره په دوهم ځای کې دی، چې شاوخوا ۱.۲۳ میلیونه نارینه او ۱.۲ میلیونه ښځې پکې شاملې دي.
د احصایې او معلوماتو ملي ادارې دا احصایې د نفوسو د نړیوالې ورځې په مناسبت خپرې کړې دي.
تېر کال، ادارې د افغانستان نفوس ۳۶.۴ میلیونه اټکل کړی و. نوی اټکل ښيي چې د هیواد نفوس په تېر کال کې ۲.۲ سلنه یا شاوخوا ۸۰۰،۰۰۰ کسان زیات شوي او ۳۷.۲ میلیونه ته رسېدلی دی.