د دید خبري اژانس: د پاکستان ولسمشر په یوه رسمي پیغام کې ډونالډ ټرمپ ته د امریکا د خپلواکۍ د ورځې په مناسبت پاکستان ته د سفر بلنه ورکړه.
ټرمپ اسلام آباد ته د سفر بلنه ورکړه
د پاکستان ولسمشر آصف علي زرداري په یوه رسمي پیغام کې د امریکا د متحده ایالاتو ولسمشر ډونالډ ټرمپ ته د جولای د څلورمې نیټې، د امریکا د خپلواکۍ د ورځې په مناسبت پاکستان ته د سفر بلنه ورکړه.
د ایکس ټولنیزې شبکې د پاکستان د ولسمشرۍ د رسمي حساب د اعلان له مخې، زرداري د امریکا د خپلواکۍ د ورځې د مبارکۍ په ترڅ کې د اسلام آباد او واشنګټن ترمنځ د اړیکو پر اهمیت ټینګار وکړ او له ټرمپ څخه یې وغوښتل چې په نږدې راتلونکي کې پاکستان ته سفر وکړي.
په پیغام کې ویل شوي چې د پاکستان خلک په اسلام آباد کې د امریکا د ولسمشر هرکلی ته لیواله دي او د هغه کوربه توب د خپل هیواد لپاره ویاړ ګڼي.
پاکستاني چارواکو دا هیله هم څرګنده کړې چې دا سفر کولی شي د همکارۍ پیاوړتیا او په مختلفو سیاسي، اقتصادي او امنیتي برخو کې د دوه اړخیزو اړیکو پراخولو لپاره لاره هواره کړي.