د دید خبري اژانس: ازبکستان او قطر په یوه ګډه غونډه کې د افغانستان د دوامداره پرمختګ لپاره د دوه اړخیزو همکاریو او ملاتړ د پراخولو پر لارو چارو بحث وکړ، او د هیواد د ثبات او اقتصادي ودې د پیاوړتیا لپاره یې د دوامداره همکارۍ ټینګار وکړ.
د ازبکستان د بهرنیو چارو وزارت اعلان وکړ چې دا موضوع پرون د افغانستان لپاره د ازبکستان د ځانګړي استازي عصمت الله ارګاشف او په ازبکستان کې د قطر د سفیر حسن حمزه هاشم ترمنځ د غونډې په جریان کې راپورته شوه.
د وزارت د بیان له مخې، دواړو خواوو د سوداګرۍ، پانګونې، ټرانسپورټ، لوژستیک، او همدارنګه د کلتوري او بشري پروګرامونو په برخو کې د همکارۍ د پراختیا په اړه بحث وکړ چې کولی شي په افغانستان کې د ټولنیز او اقتصادي وضعیت ښه کولو کې مرسته وکړي. سیمه ایز پرمختګونه او د افغانستان پورې اړوند مسلو کې د لا همغږۍ لارې چارې هم د غونډې د نورو موضوعاتو په منځ کې وې.
د ازبکستان د بهرنیو چارو وزارت زیاته کړه چې قطري لوري د افغانستان د بیارغونې او اقتصادي پراختیا د ملاتړ لپاره د تاشکند د دوامداره هڅو ستاینه وکړه او د مرکزي آسیا کې د خبرو اترو، سیمه ایز اتصال او ثبات د پیاوړتیا په برخه کې یې د ازبکستان رول مهم وباله.
د غونډې په پای کې، دواړو خواوو د ازبکستان او قطر ترمنځ د همکارۍ په پیاوړتیا، د افغانستان په اړه د رغنده خبرو اترو پر دوام، او د سولې، اقتصادي پراختیا او سیمه ییزې اړیکې د زیاتولو لپاره په ګډه همکارۍ ټینګار وکړ.